KRESALA
BILBO ZAHARRA euskaltegiko ikasle-irakasleok Klasikoen irakurketa jarraitua antolatu dugu hamaikagarrenez, ikasturtearen amaieran eta Ikasleen Jaia ospakizunaren barruan. Irakurketa eta jaia.
Aurreko urteetan, Axularren Gero, Mogelen Peru Abarca, Jon Miranderen Haur besoetakoa, Saizarbitoriaren Hamaika pauso, Arantxa Urretabizkaiaren Zergatik panpox, Bernardo Atxagaren Obabakoak, Gabriel Arestiren Harri eta herri, Sarrionandiaren Narrazioa Guztiak, Franz Kafkaren Metamorfosia, iaz Itxaro Bordaren %100 Basque eta aurten Txomin Agirreren Kresala.
Zer irakurri erabakitzeko orduan, lehenengo lau edizioetan, ordena kronologikoaren irizpidea baliatu genuen. Hots, XVI. mendeko liburu batekin hasi, XVII. mendeko beste batekin segi, XIX. mendearen erdira iritsi eta ia XXI. mendean bukatu genuen. Hiru jauzi izan ziren: bi ehun eta hirurogei urtekoak, eta bat berrogeita hamarrekoa, euskal literaturaren historian barrena. Azkenengo hiru edizioetan, aldiz, bestelako irizpidea baliatu dugu. Zergatik panpoxen kasuan, emakumezko literaturaren aitzindari izatearena; Obabakoak-enean, argitaratu zeneko 25. urteurrena ospatzearena; 2014koan, euskal poesiari ateak zabaltzea eta, bidenabar, liburuaren 50. urteurrena ospatzea. Orain dela bi urte, Joseba Sarrionandiak narrazioen ibilbidea bukatu zueneko 25. urteurrena izatea eta, ondoren, lehen aldiz, itzulpenaren balioa eta garrantzia nabarmendu eta aldarrikatu nahi izan genituen. Iaz, estereotipoetatik ihesi, gaur egunera etorrita eta euskal literaturan emakumezkoen protagonismoa aldarrikatuz, Itxaro Bordaren %100 Basque. Aurten, bizkaieraren garrantzia azpimarratuz eta Euskaltzaindiaren eta euskara batuaren urteurrenak ospatuz, Txomin Agirreren Kresala izango dugu protagonista.
Garrantzi handikoa, dudarik gabe, ekainaren 7an egingo dugun irakurketa-jaia, beti bezala, Arriaga antzokian. Hamabi ordu, 400 irakurle, 50 euskal etxe, eragile sozialak… irakurle eta entzule, guztiok gonbidatuta zaudete literatura eta euskara batzen duen jai honetara.
Hauxe izan da gure ibilbidea:
| LINGUAE VASCONUM PRIMITIAE (1545) | XVI | |
| Iesus Christ Gvre Iavnaren Testamentv Berria (1571) | ||
| Manual debozionezkoa (1627) | XVII | |
| GVERO (1643) | ||
| Oihenarten gaztaroa neurtitzetan (1657) | ||
| Eskuararen hatsapenak (1718) | XVIII | |
| Euskararen berri onak (1761) | ||
| PERU ABARCA (1802) | XIX | |
| Iparragirre (1839) | ||
| Bi saindu euskaldunen bizia (1867) | ||
| KRESALA (1906) | XX | |
| METAMORFOSIA (1916) | ||
| HAUR BESOETAKOA (1959) | ||
| HARRI ETA HERRI (1964) | ||
| ZERGATIK PANPOX (1979) | ||
| OBABAKOAK (1988) | ||
| NARRAZIO GUZTIAK (1979-1990) | ||
| OTTO PETTE (1994) | ||
| HAMAIKA PAUSO (1995) | ||
| %100 BASQUE (2001) | XXI | |
| BILBAO-NEW YORK-BILBAO (2008) | ||
| MARTUTENE (2012) | ||
| KRISTALEZKO BEGI BAT (2013) |
