Tere Irastortza eta Aingeru Epalza (2021/05/31)

“Linguae Vasconum Primitiae”

Zaldibian jaioa, 1961ean.

Euskal idazlea da.Gaur egun Olaberrian bizi da.

Euskal Filologia eta Hispaniar Filologia ikasketak egin ondoren, emakumeari buruzko literaturan, semantikan eta ideologian interesa agertu zuen.

1990eko hamarkadako erdialdean, hasi zen Bergarako UNEDeko Ikastetxe Elkartuan lanean. Beasaingo Andramendi Ikastolako zuzendaria da 1996tik. 2001etik 2006ra bitartean, Euskal Idazleen Elkartearen presidentea izan zen. 2003an sortu zenetik, Bergarako Idazle Eskolako sortzailea, irakaslea eta zuzendaria da. Euskal Pen Klubaren sortzaileetarikoa da, 2004an.

Literatura arloko honako webguneen sortzean ere parte hartu du: www.idazten.com eta www.iztueta.com

Obra poetiko oso oparoa osatu du harrezkero, estilo desberdinetakoa. Koldo Izagirreren iritzian: “Haragitasunetik datorren hegaldia da Tere Irastortzarena, hizkerarik arduratuena eta aldi berean hunkigarriena duen poesia”. Bere lehen obra 1980an argitaratu zuen Gabeciak poesia liburua. Bere poemak, hainbat antologiatan bildurik, italierara, gaztelerara, frantsesera, ingelerara, katalanerara eta gailegora itzuliak izan dira.

Itzulpengintza ere jorratzen du, Marià Manent eta Edmon Jabés katalanetik, Marina Tsvetaieva frantsesetik, idazleak euskaratuz.

Liburuak argitaratzeaz gain, hainbat eta hainbat ekimenetan hartu du parte. Aldizkari ugarien sortzaile izan da: Susa, Kandela, Goierritarra eta Kalegats. Urte askoan Argian, Nabarran eta Mugalarin idatzi ditu artikulu eta zutabeak. Maiatz, Ttu-Ttua, Administrazio  Euskaraz, Egan, Karmel Hegats eta Jakinen ere argitaratu izan ditu saio laburrak. Euskadi Irratiko Klasikoen Giltzak musika saioaren idazketa ere bost urtez zuzendu zuen.

1980an Kritika Saria euskarazko poesiari saria jaso zuen Gabeziak lanagatik Gaia eta gau aldaketak R.M. Azkue Sarian aipamena 1981. Hostoak Bilbao Aurrezki Kutxak egilearen liburua saritu eta argitaratu zuen, 1982an. 2003an, errepikatu zuen Espainiako Kritika Saria ,Glosak. Esana zetorrenaz obrarekin.

Iruñean jaioa 1960an.

Euskal idazlea. Kazetaritzan lizentziaduna. Deia, Euskal Telebista eta Navarra Hoy hedabideetan ibili ondoren, Nafarroako Gobernuko itzultzailea da gaur egun. Ondotik ere, kolaborazio anitz argitaratu du Noticias de Navarra, Argia eta Nabarra-n.

Lehenbiziko idazlanak Korrok fanzinean karrikaratu zituen, 1984-1989 bitartean. 1990. urtean Nafarroako Ikastolen Federazioko lehendakari bihurtu zen. Urte berean,  Rikardo Arregi Kazetaritza Saria irabazi zuen Baloraziozko Kazetaritza atalean.

Antzerki lan bat (Mugetan Irri, 1984) eta poema liburu bat (Ahur taupada geldoak, 1985) kaleratu bazituen ere, ondoko lanak narratibazkoak izan ziren: Sasiak ere begiak baditik (1986), Garretatik erauzitakoak (1989), Ur uherrak (1993), Lur zabaletan (1994) eta Tigre ehizan (1996). Eleberri labur honekin Euskadi Literatura saria irabazi zuen 1997an.

Horrez gain, Nafarroako Euskararen Kontseiluko ordezkaria izan zen, baina 1999an kargua utzi zuen Nafarroako Gobernuaren euskara politikarekin bat ez zetorrela eta.

1999an Joseba Jaka beka irabazi zuen, eta laguntza horri esker kaleratu zuen 2000. urteko azaroan Rock’n’roll izeneko lana. 2006 eta 2013 bitartean, Erresuma eta fedea trilogia argitaratu zuen, XVI. eta XVII. mendeetan kokatutakoa: Mailuaren odola (2006), Izan bainintzen Nafarroako errege (2009) eta Gure Jerusalem galdua (2013). 2007an Bezperaren bezpera atera zuen, Nafarroako abertzaletasunari buruzko saiakera-lana.